政情：高官死不撤辣 唔知民間疾苦 石禮謙鬧爆許正宇離地

議員指企業冀套現物業做生意

議員鍾國斌話依家好多企業面對現金流問題，希望出售物業套現做生意，認為依家商舖價格同需求大跌，政府應該就商用物業減辣，保住間公司之餘仲可以保就業。

許正宇回應話依家唔係合適嘅時機放寬措施，話物業供應仍然緊張，而樓價亦處於難以負擔嘅水平，擔心一旦對非住宅物業「撤辣」，會被市場趁機炒作，對非住宅物業嘅亢奮需求會蔓延到住宅物業，繼而進一步推高樓價。不過，佢都話好明白企業喺疫情期間面對現金流問題，但喺放寬樓市需求管理措施之外，仲有其他方法幫到企業，例如政府已經推出咗防疫抗疫基金同保就業計劃喇！

「溫馨提示」勿學被踢走嘅前任

但係石禮謙就唔收貨，仲怒斥許正宇，話許新上任，點知同被「踢走」嘅前局長（劉怡翔）一樣唔夠貼地，石亦補番句話當然希望佢唔好走啦，但就溫馨提示佢要學識面對社會問題，唔好同社會距離太遠。

石禮謙仲邀請許同佢一齊去市面了解情況，睇吓有幾多吉舖，唔好等到出現負資產先正視問題。石禮謙發言嗰陣好嬲，最後仲話唔需要許答問題，廢事畀佢激嬲。

雖然石禮謙話唔使許正宇答佢，但許倒返轉頭安撫石，話希望石稍安毋躁，又話自己上任三個月，成日提醒自己要謹記兩個字，就係要「貼地」，認為自己經驗尚淺，要同大家討教。講到咁，以為許會改變態度喇！點知最後佢又重複話覺得依家減辣唔係合適時機，需要時間再觀察經濟情況同物業市場變化。

石禮謙喺大會質詢完許正宇仲未消氣，要出去咪兜再鬧過，話許正宇唔回應議員訴求，政府亦唔知市民面對嘅問題，忠告政府要盡快研究放寬樓市需求管理措施。