政情：休會睇牛津辯論片 石禮謙：想了解後生仔
唔少議員喺立法會會議期間，都鍾意透過智能手機接收外界資訊。尋日朝早財務委員會會議接近尾聲，地產及建造界議員石禮謙就喺休會期間，示範畀大家睇佢係一位相當「貼地」嘅議員，到底佢睇緊乜嘢？之唔係一間知名學府嘅辯論片段囉！
雖然石禮謙今年已經七十五歲，不過佢話唔想落後於時代，同埋好想了解時下年輕人嘅諗法，所以趁住空檔嘅時間，用手機上網收睇英國牛津大學嘅辯論，話題係探討英國需否為過去殖民印度而「找數」，佢覺得呢場辯論好好睇，正反兩邊陣營唇槍舌劍，啲後生仔激辯得好精彩咁話。
開頭唔認喺會議室用手機
之不過，石禮謙開頭係唔承認自己喺會議室睇片，又話自己當時去咗立法會餐廳食早餐，直至目睹記者拍攝到自己睇手機嘅片段，知道「斷正」之後就話估唔到畀人影低睇片嘅過程添！
