政情：兒童事務委員會一事無成 何啟明被斥玩失蹤
兒童權益備受關注，財務委員會尋日審議勞工及福利局開設一個首席助理秘書長職位，領導兒童事務委員會提供支援同促進兒童權益嘅議程。多名議員批評兒童事務委員會冇實質嘅工作表現，狠批近乎一事無成，更點名直斥新任勞福局副局長何啟明冇出席會議。
財會仍通過開位審議
有議員直斥兒童事務委員會近乎一事無成，更點名斥何啟明冇出席會議，指當中嘅保護兒童事務工作小組自成立以來冇召開會議，批評政府整色整水，冇將兒童權利放喺眼內，質疑開設職位的迫切性。
另一名議員亦話唔理解兒童事務委員會嘅職責，又指過去學童自殺係屬於社會議題，上月更出現一個月內有三宗學童自殺個案，質疑開設職位後是否能解決問題。
勞福局副秘書長梁振榮回應時話兒童事務委員會決議成立四個工作小組，但現時只成立三個工作小組，第四個則因人手緊絀而仍未成立，喺開設職位後爭取成立。佢又話曾安排警方代表同事務委員會跟進舊年嘅社會事件。對於有關學童自殺問題，佢話兒童事務委員會關注相關議案，亦已列入主要議程嘞！
雖然有議員鬧得咁厲害，但財會最終都通過咗呢個開位建議。