政情：掟臭彈咪賴帳議員唔賠會扣糧

早前身兼立法會行政管理委員會主席嘅立法會主席梁君彥明言，將會向佢哋追討清潔費，朱凱廸尋日喺Facebook出貼，話收到行管會一張總數逾廿七萬元嘅單，而朱同陳要各自負責當中超過十一萬元嘅費用，峯鴿則要承擔當中五萬多元。據貼文指出，行管會仲講明如果喺今個月廿六日之前唔畀錢，就會喺人工度扣番咁話。

峯鴿貼文講明唔會畀

同日陳志全聯同朱凱廸做咗個網上直播，話覺得張單嘅收費係亂咁開，事前又冇諮詢過佢哋喎，睇落似係想同行管會講數。雖然佢哋就冇講明究竟會唔會賠錢，但唔賠嘅話又有乜需要講數呢？睇番佢哋貼出嚟嗰張單，原來收費包括換氣程序（二千多元）同吹乾地氈（逾一萬三千元）嘅電費、清潔工人工（近四千元）、換地氈（約十萬元）、議員枱櫈（六萬二千多元）、電腦屏幕（八千多元）同埋保安制服（朱凱廸約四千元；陳志全則二千多元）。

至於峯鴿亦喺社交平台貼出單據，雖然要賠償嘅項目都差唔多，但金額就相對細好多，約需賠償五萬二千元，佢仲貼文話「唔同意，唔會畀」添。

行管會預咗泛民走數

之不過正所謂「你有張良計，我有過牆梯」，有行管會成員向本報透露，行管會確實喺會議間傾過民主派唔還錢嘅問題，問到係咪預咗佢哋好大機會走數先會諗定後備收數方案，佢都好斬釘截鐵咁話「係！泛民好興唔畀錢，所以先有呢一着。」又指行管會已經諮詢過法律意見，呢個做法係可行，言下之意咪即係今次想賴帳都唔得囉！

據悉，除咗透過扣人工追討清潔費，行管會仲可以喺三人做滿四年議員嘅七十萬元約滿酬金裏面抵銷相應金額，或者喺議員申報開支嘅補領金額內，扣除相應金額當作還債，等佢哋冇得抵賴。

另外，另一位行管會成員就認為「欠債當然要還錢，係睇點還嘅啫」。咁又係，喺三人決定掟出「臭蟲」同「臭彈」嘅一刻，又點可以冇預過為自己嘅行為負責呢？