中環出更：柯仔擁6議辦 秘訣「人棄我取」
過往唔少立法會議員同區議員都投訴過好難搵地方設議員辦事處，部分議員仲要租用貨櫃作為議辦，政府甚至被質疑「大細超」。不過身兼觀塘區議員嘅立法會議員柯創盛（柯仔）竟然開到六個議辦。佢就解釋，係因為自己連蚊型議辦都唔放過，實行「人棄我取」策略。雖然工作忙到冇停手，連睇嘅中醫都勸佢抖抖，不過佢就話，工作忙皆因市民信任，所以一啲都唔怕「旺場」喎。
唔肯聽中醫勸
經常都有議員話好難申請舖位開議辦，柯仔話佢都有遇到同樣情況，所以連蚊型議辦都「照殺」。好似尋日開張嘅彩虹新議辦，地方細又冇廁所，因位置所限，只服務到一幢公屋居民，多年嚟都冇人問津，佢見自己當區冇地方「落腳」先決定「照殺」，話最多做多啲流動街站補數。
講開先知柯仔原來有睇開中醫，中醫仲叫佢唔好咁操勞添，唔通佢身體有事？柯仔解釋目前身體無大礙，一切健康，中醫嘅建議都係預防為主。不過佢都承認因工作忙碌，經常連瞓覺嘅時間都冇，有時甚至瞓得三個鐘，但佢認為忙代表市民信任佢，最多喺飲食上注意多啲，減少食消夜咁話。
卓妮