中環出更：削撥款放飛機 徐英偉遭區會主席冷待
新一屆區議會大部分都係由民主派主導，同政府關係麻麻哋，而上任無耐嘅民政事務局局長徐英偉早前約見各區議會正、副主席，試圖「破冰」，但慘遭「食檸檬」。有區議會主席話，徐約見區議會突然「放飛機」兼臨時改期，加上徐喺無諮詢區議會嘅情況下削減各區撥款，先導致雙方關係「劍拔弩張」喎。
「遊樂場」論惹不滿
依家各區都話有嘢忙緊，仲話見到徐都唔知傾乜嘢。觀塘區議會主席蔡澤鴻話，就算唔傾政治，轉為討論民生項目，政府都唔回覆、唔評論、唔參與，而區議會知多啲又唔得、總之乜都唔得！佢話區議會提出讓步，表明唔擱置觀塘區音樂噴泉項目，只稍作改動，都遭到民政事務總署反對。而徐早前話「區議會好似遊樂場」，已經令蔡覺得唔會有乜嘢實質討論結果喇。
北區區議會主席羅庭德直言對徐英偉「呢舊嘢」冇乜感覺，但如果徐約見嘅話，都會去見吓嘅。但依家臨近雨季，羅話北區好多「修橋補路、預防水浸」嘅工作要做，所以唔得閒見喇。羅又話，最近好多學生啱啱考完中學文憑試，都需要幫學生搵實習，不如做埋啲實質嘢先，得閒先再搵徐喇。各區對徐英偉嘅評價都咁差，睇嚟徐都要諗吓計先得。
卓妮