民政事務局局長徐英偉話，現有嘅制度只係須要符合消防及安全規定就可以申請牌照，無排除經營民宿，過去幾年社會上一直要求加強管制無牌旅館。他又話近嚟旅館業受社會事件同新冠肺炎疫情影響，當局有需要落實相關措施喎。
至於共享住宿交易平台嘅發言人就話，公司一直都提倡修訂條文令發牌制度涵蓋規管共享住宿，為香港嘅旅遊經濟復甦帶嚟貢獻，但係香港就錯失咗呢個機會，佢哋都覺得好遺憾。
「頭痛醫頭 腳痛醫腳」 考慮不周
議員胡志偉批評，政府處理問題手法「頭痛醫頭、腳痛醫腳」，當局希望透過修訂解決過去發牌時無考慮嘅地契條款等問題，但同時扼殺了新興嘅民宿行業，批評政府過去無聆聽同回應市場嘅聲音，最終咪造成對立矛盾囉！