政情：五千的士車齡逾13年 陳帆死撐老而彌堅
政府尋日喺立法會會議上交代的士相關數字，話舊年約有一萬七千部的士接受運輸署車輛檢測，有議員就發現當中五千部的士車齡超過十三年，質疑其安全性，仲大鬧政府畀市民坐「垃圾廢鐵車」係非常不負責任嘅行為！
會議上有議員話「的士綜合保險保費」同「第三者風險保險保費」大幅增加，亦有保險公司停止承保車齡較高嘅的士，希望政府諗辦法改善及交代相關數字。運輸及房屋局局長陳帆就話去年有一萬七千二百零八架的士接受檢測，結果全數合格。
議員諷不如抬轎
點知議員何君堯就發現當中約五千架的士的車齡超過十三年，即大鬧「廢鐵點可以喺馬路上面走」，話如果自己係保險公司要承保，加十倍價都不為過。何又鬧爆政府對市民非常不負責任，話不如唔好揸的士，改為抬轎啦，起碼慢慢行唔會死人呀！
陳帆就「死撐」話車齡同機件唔一定成正比，話好多議員年紀成熟但仍然健步如飛，但轉個頭又承認車齡高就要檢測多啲，又保證檢測結果係安全。俗語有話「年紀大、機器壞」，唔知陳帆有冇聽過呢？