政情：公民講場：電子煙一早賣通街 食衞局離地：趁成潮流前禁

被譽為「禁煙專家」嘅食物及衞生局局長陳肇始要一刀切「封殺」電子煙，講到係威係勢，但由公布修例開始就搵副秘書長阮慧賢擔大旗，唔通係怕被人鬧做得慢有疏漏要避風頭？立法會禁電子煙嘅法案委員會尋日首次開會，陳肇始繼續冇影，阮慧賢回答議員質疑時就話，要喺電子煙相關產品未成為潮流前禁止，以防影響青年嘅健康喎。查實電子煙一早就賣到成行成市，啲舖愈開愈多，食衞局竟然懵然不知，仲夠膽話要喺成為潮流前禁止，認真離地！