政情：家人健康出問題 柯創盛棄選立會
立法會選舉將於九月舉行，繼民建聯議員蔣麗芸放棄競逐連任後，其黨友柯創盛（柯仔）昨日亦話因為家人健康問題，需要時間照顧陪伴，而立法會工作又比較繁重，所以決定放棄參加立法會選舉。柯仔發言時一度眼紅同哽咽，話近日領導層有作出挽留，強調退出係個人決定，仲話呢個係艱難嘅決定，但現時想停一停先，要對屋企人作交代。
會繼續區會工作
柯仔目前仲身兼觀塘區議員，而今屆區議員任期仲有三年幾，佢話會繼續區議會工作，相信一個細區都能夠應付到。至於九龍東議席要臨時換將，柯仔就冇答邊個頂替喇。至於家人如情況好轉，又會否考慮參選？柯表示「never say never」，但依家想用多啲時間陪家人。先前蔣麗芸被指唔參加立法會選舉，回應時都講過「never say never」，但最終會否參選，咁就唔知喇，相信要稍後時間才能確定。