中環出更：提升同業地位 徐汶緯逆轉「廚房佬」形象
公餘進修，肯定有利於事業發展。不過喺劇烈嘅生意競爭下，為同業鋪排一條提升營運水平嘅路徑，到底係一門乜嘢嘅哲學呢？稻苗學會主席徐汶緯，憶述自己當初報讀稻苗培植計劃課程，都有諗過呢個問題，不過佢好快就體會到，推動業界共同進步，較生意競爭更為重要。
徐汶緯指飲食業入行門檻低，從業員不但多屬紅褲子出身，兼且咬住香煙、腳穿拖鞋去開工嘅「廚房佬」，同醫生、律師嘅專業形象大相逕庭，以致家長都唔願意自己嘅子女投身飲食行業。要扭轉呢個對業界不利嘅局面，就要由改變文化方面入手。佢話稻苗培植計劃創辦人鍾偉平多年來同職訓局合作，又斥巨資培訓同業嘅做法，唔可以用「同行如敵國」嘅觀念嚟理解，而係藉此提升中式餐飲業人員嘅質素及專業地位，以及建立中式食肆嘅管理文化，換言之，係一個令業界擺脫惡性循環，步向良性互動嘅必然舉措。
楊位醒指中廚曾有諸多陋習
香港餐務管理協會會長楊位醒從事行業培訓多年，指中廚往往以為自己並非樓面工作，就不修邊幅同漠視個人衞生，加上嗜賭如命，諸多陋習以致坊間過去曾流行一句說話「有女唔嫁酒樓佬」，可見中菜從業員嘅地位係何等低落。後來中華廚藝學院成立，邀來酒店出身嘅中廚擔任導師並引進酒店管理規範，經過接近廿年嘅努力，今日嘅中廚已經有一定嘅改進，亦有較高學歷嘅年輕人願意從事廚師工作，對業界而言係一個可喜嘅現象。
傑出青年協會前主席趙傑文，其經營嘅社企餐廳因員工多屬退休人士，自律性會較高。不過佢都覺得中廚確有陋習，然而可透過改善管理嚟解決，譬如員工一旦需要解決煙癮，過程中不宜張揚亦不可以公司制服示人。佢又認為西廚嘅文化及管理的確有其優點，值得借鑑同倣效。
卓妮