政情：戴耀廷李漢奸曾赴英告洋狀 冇人理被斥嘥氣
本港反對派或民主派經常到外國「唱衰香港」，又乞求外國政府干預香港內部事務，甚至制裁香港。一心山長水遠飛去外國告洋狀，以為見到外國政要講兩句就立大功，結果遭冷待收場。違法佔中發起人戴耀廷尋晚自爆，曾經與外號「李漢奸」嘅民主黨創黨主席李柱銘去英國搵保守黨議員討論香港問題，點知無人理佢哋，仲寸爆佢哋嘥氣，真係自己攞架嚟丟！
喺保守黨開會地方走來走去
本港多間大專院校昨晚於港大學生會大樓舉行名為聯合集會討論「港版國安法」，約有一百人出席。港大法律系副教授戴耀廷自爆，喺二○一八年曾與李漢奸到英國尋找保守黨議員，打算同對方商討香港問題，但喺保守黨召開大會嘅地方走來走去，亦未獲理會，最後只有一名委員會主席同佢哋講：「嘥氣啦你哋，冇人會理你哋，最緊要係同中國貿易。」戴耀廷冇人識都唔出奇，但自以為仍有政治能量嘅李漢奸獲如此冷待，真係情何以堪！
不過，戴耀廷死撐話，喺反修例運動同「港版國安法」出台後，現時不用再作游說，因香港事務已受國際關注。如果係咁，咪證明過去反對派告洋狀都係嘥氣兼多餘囉。