政情：自嘲就破產 游蕙禎疑拍片撲水還債
話說因捲入宣誓風波而被法庭裁定喪失立法會議員資格嘅游蕙禎同梁頌恆，早前畀行管會入稟區院追債，要求佢哋償還已發放嘅議員薪津，而法庭亦喺上月初判行管會勝訴，下令梁游要向行管會交還共約一百八十六萬元薪津，及支付行管會嘅訟費。唔知係咪要周圍撲水還債，潛咗水一段時間嘅游近日終於喺網上蒲頭，上載帶有行銷意味嘅短片，仲自嘲就嚟破產添。
前黨友梁頌恆已另入政團
其實游自從議席被DQ後，近年都甚少喺公眾場合露面，連之前行管會追還薪金嘅法庭聆訊都缺席。佢早幾日突然喺影片平台上載短片，話事隔一年終於出第二條片，又解畫指之前因諗唔到題材可以講，先至搞到一年都無出片，仲自嘲「實有人話我就嚟破產仲講相機」咁喎。言下之意，莫非喺之前成年都冇人搵佢合作拍片賣廣告？
游依家就已經退出咗原屬政黨青年新政，相反，其前黨友梁頌恆就喺二○一八年，加盟香港本土派團體「香港民族陣綫」度做發言人，近期佢都有出現喺公眾面前。