政情：沙中線醜聞議員狙擊 陳帆做鴕鳥堅拒辭職

早前沙中線嘅調查委員會批評政府監管不力，港鐵及承建商亦管理不善，需要為事件負責，但點知到依家都冇人認頭負責，完全冇咗件事。立法會鐵路事宜小組委員會及財會尋日不約而同討論沙中線工程，分別討論工程進度及審批一百億六千萬元嘅追加撥款，難得陳帆出席會議，一眾議員絕對唔會放過佢，瘋狂質詢。

「稍有廉恥就應該要下台」

陳帆曾指政府同港鐵董事局喺事件上都係被蒙在鼓裏，又話涉事職員已經離職。唔少議員尋日繼續鬧爆陳帆卸責，鐵路事宜小組委員會上，議員林卓廷就炮轟話陳帆有三十幾萬元月薪，但出事就將所有責任推畀前線，仲話唔關自己事。佢仲鬧爆話，如果用陳帆嘅邏輯，港鐵前行政總裁梁國權都唔使辭職啦，反問陳帆知唔知咩係政治問責官員，認為佢稍有廉恥就應該要下台。

「發窮惡」威脅議會批撥款

陳帆朝早被議員鬧完，下午又要去財會攞錢，仲警告話如果財會唔批出沙沖線百億元追加撥款，最快會喺十月停工，仲有成三千人飯碗受影響添！有議員就狠批政府「發窮惡」同感情勒索，威脅議會批出撥款，議員郭家麒仲形容沙中線係最多醜聞嘅工程，批評政府等多個部門冇人問責，要求陳帆應該辭職下台。

雖然有唔少議員鬧爆政府冇人問責，但陳帆就繼續死撐話政府同董事局都被蒙在鼓裏，話負責嘅港鐵人員已經離開咗崗位喇。至於多次被要求下台，但陳帆就冇正面回應，淨係話有責任嚴肅跟進調查委員會建議，又話政府做緊系統性檢討喎。今屆政府任期只餘下兩年多少少，按照政府做嘢速度，分分鐘拖到任期完結都未搞掂，到時陳帆唔使問責都夠鐘起身，與其係咁，不如問責官員改名做「卸責官員」啦！