政情： 新官上任 何啟明被嘲似學生

但當何遇到英語提問，第一句回應竟然係話「呢位記者提出好多問題」，然後拎出早已放喺袋嘅「貓紙」，開始反覆閱讀。唔知羅致光係咪睇到呢個情況而怕何搞唔掂，即刻「護短」並用英文講「我回應第三條問題」，而何得到「老細」幫手後亦都放心作答。但唔知何係咪太過緊張，定係英文水平屬「有限公司」，過程中難免有啲「甩甩咳咳」，但都總算完成任務，羅亦都隨即「接波」，幫手答埋第三條問題。

身體語言顯出冇自信

其實喺問答環節中，有記者指坊間有人質疑何嘅能力，包括英語能力。何回應話市民自有公論，而當記者提出英文問題嘅時候，何就需要拎「貓紙」，唔知市民嘅公論係點呢？英文水平好唔好，其實都唔緊要嘅，畢竟何喺發言嘅時候都講過會同羅局長「取長補短」，多多向局長學習嘛！不過有民主派議員就發現羅致光喺影相期間搭住何啟明個膊頭，喺社交平台上載相片並形容何啟明為「似畢業生上台致詞多過似一個副局長」，仲揶揄何擺出嘅姿勢係「冇自信嘅身體語言」添。有網民留言覺得何啟明太後生，質疑缺乏經驗難以勝任；亦有網民對前民主黨嘅羅致光，揀工聯會嘅何啟明做副局長感到詫異。

羅致光：何係副局首選

咁羅致光點睇自己嘅選擇呢？羅就話副局長人選方面已考慮不同政治背景，亦需要同友好團體及政黨有良性互動同合作關係。羅又話好多人問，究竟係邊個話要揀何做副局長，羅回應話「梗係我揀(口架)啦！」仲話何係副局長嘅首選添。

至於何喺擔任議員嘅時候成日批評羅，會唔會影響合作關係呢？何經常要求政府設立緊急失業援助金，但羅一直「企硬」唔做，依家何作為副局長仲會唔會繼續爭取呢？何就回應話唔同崗位有唔同角度，會積極學習，亦會同政府繼續商討設立失業援助金。何講得咁婉轉，睇怕係初來甫到，唔敢得罪「新老細」啦！

另外，有網民指何啟明出任問責官員之前曾向黨友諮詢意見，質疑上周五還是議員身份嘅何啟明，已經確定自己將獲委任為副局長，而何出席財務委員會並喺五十四億元海洋公園救亡撥款中投贊成票，有利益衝突之嫌，認為何必須向公眾同執法機構交代。