中環出更：陳茂波眼泛淚光賴燈光
財政司司長陳茂波尋日上晝出席完立法會會議後見傳媒，講緊現時嘅經濟狀況時，佢突然雙眼通紅，淚眼汪汪好似喊緊咁。疑似流淚嘅相片仲引嚟網上一片瘋傳，唔少網民都關心到底佢係咪有眼疾，抑或對本港未來經濟未感樂觀？
唔知係咪見咁多人關心自己，陳茂波晏晝就喺社交網站上貼文，話多謝大家對佢嘅關心，澄清今次只係一場誤會，仲Hashtag話自己係「被流淚」添！佢話自己由中午開始突然收到好多朋友嘅問候，原來佢哋喺電視畫面上睇到自己回答記者問題時，好似「眼泛淚光」；但佢解釋，嗰陣啱啱出席完財經事務委員會會議，而會後答記者問題時比較長氣，長時間面對攝影機頭嘅燈光，所以先會出現呢啲「淚光」。
提醒市民要多保護眼睛
佢又特別提醒經常睇文件又唔夠瞓嘅人士，喺工作之餘亦都要多加保護眼睛，又以Hashtag大呻「人生有涯，文件無量」，又感嘆「香港人邊個會夠瞓」。佢喺文末唔單止再次「多謝各位關心」，亦都覺得今次事件「都幾搞笑」，但最緊要嘅當然係問網友「有冇眼藥水介紹」啦！
卓妮