政情：公民講場：黃錦星笨招倒米 郊野變垃圾崗

移走垃圾桶之後，郊野公園嘅垃圾不但冇消失，仲反而愈來愈多添！尋日有環保團體披露漁護署今年第一季嘅統計，郊野公園垃圾量高達八百七十四公噸，較去年同期上升逾兩成，而大帽山郊野公園、城門水塘、獅子山郊野公園、千島湖等地方不時發現有遊人遺下垃圾，當中又以獅子山郊野公園最為嚴重。環境局局長黃錦星「自己垃圾自己帶走」嘅主張，結果就係垃圾滿山，不但對環境同野生動物帶來負面影響，清理工作亦不減反增。負責清理嘅漁護署前線員工就真係多得佢唔少喇！