政情：抗疫慢半拍 嶺大跟隊搞基金
疫情重創環球經濟，大學生畢業就隨時變成失業。繼早前本地有幾所大學成立基金，反應慢咗半拍嘅嶺南大學尋日亦都跟隊，宣布成立「二○二○年畢業生支援基金」以協助應屆畢業生咁話。
助畢業生搵工
嶺大校長鄭國漢話，新冠肺炎疫情令香港各行各業步入寒冬，嚴重挑戰畢業生嘅就業機會，預料應屆嶺大畢業生喺搵工同事業發展方面，將面臨前所未有嘅困難。鄭校長話非常關心畢業生，新基金嘅設計不僅為佢哋提供工作機會，仲支持佢哋喺逆境當中提升技能或創立事業。鄭校長又呼籲嶺大社群同社會人士大力支持基金，包括捐款或提供職位、實習同社會服務機會，以協助應屆畢業生。至於基金係由嶺南大學校長鄭國漢同副校長莫家豪發起，兩人上月決定各捐出一年薪金嘅百分之十。