政情：投完票先訂杧果 葛珮帆：唔好屈我偷懶
立法會內務委員會尋日選舉主席又爆混亂，趕走逾十名泛民主派議員後，終於可以進入投票程序，而有網媒就影到議員葛珮帆（EQ）用手提電話透過 WhatsApp訂咗兩箱杧果。EQ夜晚就喺Facebook（Fb）貼文，話佢嗰時係喺投咗票之後，等緊點票先睇吓電話，唔好屈佢偷懶，反斥班非建制派冇投票先係偷懶。
兩分鐘訂咗兩箱
有網媒報道，指葛珮帆善用投票程序嘅十四分鐘時間，喺兩分鐘內透過WhatsApp訂咗兩箱共十二個杧果，耗費一千五百元。
EQ夜晚就喺Fb貼文講清楚，話喺內會投咗票之後，等緊點票時睇吓電話，見到朋友發嚟話買咗批特別嘅杧果，叫做蜜雪杧，自己未試過，諗住買畀媽咪同朋友試吓，立即留咗兩盒，仲上載呢種杧果嘅相添！
佢仲話估唔到大家對佢買杧果都咁有興趣，就當係幫呢隻杧果做免費宣傳，仲可以支持吓啲小商戶喎。