政情：法律界太上皇施黑手 拉隊釘死區諾軒案檢控官

摷社交平台搵料 揭陳文慧鬧法官

其實今次投訴陳文慧呢單嘢，可謂有迹可尋，簡直係民主派集體大合奏，除咗安排啲反中亂港嘅傳媒去起晒陳文慧個底，作出連環報道，話佢之前喺律政司做過，之後離咗職，又搵晒佢個Facebook以前講過乜，話陳文慧除咗辱罵法官，仲用「曱甴」同「畜牲」辱罵唔同政見嘅人，唔單只咁，又公開晒陳文慧嘅個人資料、相片、家庭狀況，更有激進網民威脅陳文慧，話要佢「死全家」，認真夠晒毒辣！

之後，又安排自己友向大律師公會投訴。唔知係咪巧合，咁啱民主黨區議員袁海文發功，佢話自己已經向大律師公會投訴陳文慧，話對方會影響公眾對大律師專業同捍衞法治嘅信心，又話陳文慧公開政治立場，檢控區諾軒襲警案會令市民覺得唔公平喎。

冇幾耐，咁啱有位資深大律師又向傳媒發聲，話如果陳文慧公開評論過區諾軒單案嘅案情，明顯已經對案件有成見，唔應該再出任檢控官咁話，又質疑律政司係咪故意揾個劊子手檢控區諾軒。聽聞大律師公會都處理緊單嘢，好似收到好多投訴，要陳文慧解畫。

不過，大律師公會主席戴啟思接受傳媒訪問嗰陣，就話唔會評論個別投訴，仲話公會有兩階段調查機制，若首階段認為理據足夠，會轉交大律師紀律審裁組展開紀律行動。

要求律師組織 放生涉犯聚陳淑莊

其實呢位法律界太上皇嘅過氣狀師，唔單只攻擊異己，更加對自己友多番維護，仲要求律師組織放生被指違反禁聚令嘅議員陳淑莊，自己友就明知錯都要死撐，敵人就冇證冇據都要追殺到底，呢啲人咁黑白不分，就唔好成日扮法律界太上皇啦！

有法律界人士狠批，如果有人因為自己友，利用政治平台去攻擊一名檢控官，仲要係咁資深嘅法律界人士，利用自己嘅法律知識去做啲咁嘅嘢，實在係法律界嘅悲哀，因為一個人有罪定冇罪，唔係個檢控官決定，而係由法官決定，唔應該動用所有人去攻擊佢，咁樣係唔公義，如果有證據，更有可能係妨礙司法公正，該名法律界人士又指，律師都係人，唔畀人喺網上發表評論咩，如果係咁，香港真係變咗黑色世界，冇公義嘅世界。