中環出更：林鄭減薪 僅慳得52萬
政府喺本月初宣布未來十二個月，特首林鄭月娥同問責班子自願減薪一成。根據行政長官辦公室回覆立法會嘅文件，特首今年嘅薪金將會由約五百二十一萬元下調至約四百六十九萬元，即係每月薪金預算由四十三萬四千二百元減至三十九萬八百元。雖然特首「減薪」，但本財政年度嘅薪金預算仍高達四百六十八萬九千六百元喎，只不過慳咗約五十二萬咋！
特首當時宣布減薪，行政會議非官守議員亦緊追其後，宣布未來十二個月捐出一成薪金。本身行政會議非官守議員喺本財政年度嘅酬金總開支係一千六百九十六萬港元，包括召集人陳智思在內嘅十六位非官守議員減薪後，將會幫政府庫房慳番一百七十萬元，酬金預算亦會減至一千五百二十六萬元。
唔夠幫自己社交平台填氹
文件亦透露特首Facebook（Fb）有幾多follower（追蹤者）。全港七百幾萬人，得約十一萬人追蹤特首個Fb。而政府喺上財政年度聘用處理特首社交平台嘅人員，薪酬開支就高達五十六萬元喎。特首減薪慳五十二萬元，但佢啲社交平台一年就要使五十六萬元。其實特首有冇諗過自己減薪條數，都未足以幫自己啲社交平台「填氹」呢？
卓妮