政情：少年黃偉鴻揸大膽車 差啲碌落懸崖
初生之犢特別有膽識。品牌發展局副主席黃偉鴻尋日喺社交網站張貼一張學生時代嘅陳年舊照，並留言指自己當時讀中三，未掌握開車技巧，就揸越野電單車，因操作不當差啲跌落懸崖，但最終都化險為夷，算係執番身彩咁話。
到底身為學生嘅黃偉鴻，係點樣搵到部越野電單車嘅呢？佢話架電單車係問朋友借，而對方自小就懂得操控越野電單車，並邀請佢同幾位同學，到粉嶺某處一嘗越野飛馳嘅樂趣。黃偉鴻話自己當時全無駕駛經驗，只係人哋指出油門同煞車嘅位置，佢就驅車上山，當駛至山丘高處因大力鎖死頭尾煞車，強大嘅衝力令到電單車側向懸崖邊緣，幸好緊張關頭佢立即放鬆煞車掣，人同電單車先至平安返抵起步點，不過就嚇到一身冷汗咁囉。而自此之後，黃偉鴻亦都好少接觸電單車喇，因為喺路面上皮包鐵，意外風險的確較高。佢又話冇戴頭盔，同欠缺合資格導師嘅指導下就貿然開車，係好危險嘅行為，叮囑大家千祈唔好倣效。
