中環出更：有動物染疫 梁福元話未驚過
香港早前出現動物確診新冠肺炎個案，搞到唔少市民都驚同寵物之間交叉傳染。十八鄉鄉事委員會前主席梁福元都養咗好多動物，但就話一啲都唔驚喎。點解咁放心呢？
對寵物負責 不放任四圍走
梁福元話養嘅動物都會放喺籠入面，唔會畀動物四圍走，所以唔驚自己養嘅動物受到流浪動物嘅傳染。佢話每個主人都應該對寵物負責，仲話人就識得避開多人嘅地方，又識得戴口罩；但動物唔識得自我隔離，亦冇可能幫動物戴口罩！佢又呼籲市民喺疫情嚴峻嘅時候，就唔好同動物有太多親密接觸，又希望政府多啲宣傳同教育市民相關知識啦！
青年事務發展委員會委員林琳亦養咗隻貓，話作為「貓奴」一定要對「主子」不離不棄，但屋企人就因為唔明白新冠肺炎傳染之間嘅因由而感到恐慌。佢惟有盡力同屋企人解釋啦，話隻貓基本上都唔會落街，而現階段又未出現貓傳人嘅個案，仲話新冠肺炎人傳人，唔通就趕人出街咩！其實佢之前喺瑞士返嚟，依家都喺屋企家居隔離中，佢仲呼籲市民要清潔雙手，先好同寵物接觸，繼而減低傳播風險呀！
香港鐘表業總會前主席梁青華就話有擔心o架！因為根本唔知點樣幫寵物做防疫措施！佢養咗隻狗，以前早晚都會帶狗仔去公園散步，但依家為減低傳播風險，就只係喺屋企附近行吓就算，佢希望專家可以快啲搵到解決方案，等所有主人都可以安心咁話喎。
卓妮