中環出更：居家避疫 郭康平：摸杯底唔一定去酒吧

郭康平指，疫情下嘅酒類銷售梗係有影響喇，因為食肆入貨少咗，但私人客反而明顯增加，仲話兩者屬唔同消費路線，餐廳入貨量多，價錢低，私人則買多咗貴酒，因此最近公司都改變營銷策略，會向士多或大牌檔推銷酒類，佢仲話，依家呢啲地方都可以飲到紅白酒o架！另外就係集中發展網上銷售，佢感嘆市道艱難，惟有見招拆招，喺各方面落多啲工夫！

王亞明疫後要試食偷師

副主席王亞明同永遠名譽會長施振忠都喺現場，王熱愛下廚，佢話由於以前喺大陸開廠，夜晚收工唔知去邊度食晚飯，就會返屋企自己煮，同鑽研吓廚藝。疫情之下，因好少出街食飯，過往嘅廚藝心得，今日就派上用場，大展身手。而佢大多都係炮製海鮮類食物，例如鮑魚、花膠及海參等，家人食過都讚不絕口o架。疫情過後就會去唔同嘅餐廳試食，偷吓師，再專研吓點樣整。

而善德基金總理王陳鴛鴦，其長子王偉雄同媳婦韓沂彤都係座上客。韓沂彤話囡囡喺疫情下出世，兩個月嚟除咗去醫院檢查外，都只可留喺屋企唔敢出街，四歲大嘅仔仔都係一樣，冇得返學，幸好有表姐表弟，大家一齊玩開心好多。問佢會唔會想繼續生？佢就笑住話態度開放，目標係生三個嘞！

王亞明（右）熱愛下廚，閒時都會專研廚藝，左為施振忠。（陳嘉順攝）

王偉雄（右）同老婆韓沂彤（左）都喺現場，中為董吳玲玲。

卓妮