政情：峯鴿搶手機調查報告 初稿完成
話說民主黨（白鴿黨）議員許智峯（峯鴿）喺一八年四月，立法會正係審議《廣深港高鐵（一地兩檢）條例草案》期間，喺立法會大樓內搶去政府女高級行政主任（EO）嘅手機，其後有建制派議員就事件提出譴責議案，相關調查委員會喺尋日召開會議。委員會主席麥美娟在會後話委員會已完成工作報告的初稿，預計能喺今個會期向立法會大會提交報告。
委員會冀今屆立會內提交
麥美娟話因為早前立法會大樓受破壞同受新冠肺炎影響，委員會嘅工作受阻延，包括需要延遲進行閉門聆訊。按現時進度，預計可以喺今屆立法會會期完結前，向立法會大會提交報告。被問到喺提交報告後，預計幾時能夠表決？佢話需要喺提交報告後，由立法會主席同秘書處安排時間進行辯論。
峯鴿喺事後被控不誠實取用電腦、普通襲擊同阻礙公職人員執行公務三罪，並且全部罪成，被判社會服務令兼罰款。
