中環出更：巿道差前路茫 趙麗娟籲青年練好AQ
突如其來嘅新冠肺炎不但重創全球經濟，香港失業率亦都不斷飆升，巿道蕭條令到年輕人對前路更覺迷茫。民眾聯席召集人趙麗娟日前去屋邨派口罩畀街坊，雖然多數嚟拎嘅都係老人家，不過佢都睇到年輕人嘅需要，又話年輕人都好需要幫助同鼓勵o架。
趙麗娟指現代人好着重IQ（智商）、EQ（情商）同AQ（逆境智商），而年輕人平時就側重於IQ同EQ嘅訓練，不過目前面對疫情同極差嘅經濟環境，就真係考驗佢哋AQ嘅時候喇！所以佢呼籲年輕人唔好失望，正所謂有危就有機，年輕人最大嘅本錢就係青春，反正畢業出嚟都未必搵到工，不妨考慮繼續讀書，或者做吓義工，試多啲唔同嘅行業，甚至可以試吓創業，一於多方面嘗試。不過一切嘅前提，就係唔好犯法同行差踏錯。
林位供拍武術短片 教居家強身
香港禪武堂主席林位供就話喺疫情底下，年輕人更加要做多啲運動，提升抵抗力，而武術就係一個唔錯嘅鍛煉，既可以幫年輕人強身健體，仲可以培育心智。依家學校停課，健身室同武館都要關閉，不過林師傅就話改為網上課堂咪得囉！佢話禪武堂仲專登拍咗啲適合喺屋企做嘅武術動作短片供學生居家學習。而學校復課後，希望可以成立青少年武術隊，為日後嘅青年奧運會武術項目培養人才。
談到年輕人，香港理工大學專業及持續教育學院資訊科技總監陳繼宇，早前就同一班中學生到以色列考察。佢發覺該國年輕男女須接受軍訓，不過軍事訓練只佔課程嘅三分之一，其他課程包括講解創業之道，訓練學生如何運用有限資源解決問題，加上以色列政府鼓勵年輕人到世界各地就業，擴闊眼界；相比之下，香港年輕人嘅視野就無咁廣闊喇。佢認為年輕人除咗去內地交流，亦應到世界各地增廣見聞，及早裝備自己，以迎接未來不同嘅挑戰。
卓妮