政情：寫錯禁聚令生效日 食衞局一個月兩甩轆 點到商戶陀陀擰

後知後覺 29句鐘後始更正

話說食衞局前日上晝近十一點半出稿，講解有關「禁聚令」嘅最新安排，當中包括「撤銷食肆顧客數目不得超過店內座位數目一半」嘅限制，而新指示會喺聽日凌晨十二點起生效，但前日局方稿件嘅註腳就誤寫為「二十三日起撤銷顧客數目限制」，咁咪即係比原定日期提前咗一日。局方仲要後知後覺，相隔咗成廿九個鐘頭、即尋日晏晝近四點半先再發稿更正，話前日稿件嘅註腳應該係「二十四日起撤銷顧客數目限制」先真。唉，食衞局果然甩漏多，咁都錯。

月初刊憲 曾誤關3類場所

食衞局甩漏都唔係第一次，對上嗰次就係發生喺月初嘅美容院停業朝令夕改風波。當時，政府誤報美容院、會所同按摩院須因應新冠肺炎疫情關閉，仲刊埋憲添，令唔少經營者都信以為真，為免犯法，急急腳拉閘停業。點知政府事隔唔夠三個鐘就「二次刊憲」澄清，話上述嘅三類場所可以繼續營業至真。

政府個烏龍擺到咁大，搞到好多小本經營嘅店主大呼「離晒大譜」，亦有民調顯示有兩成三市民覺得政府「抗疫亂龍，玩殘市民」，而食衞局局長陳肇始對於呢次「失魂」刊憲只係表示「感到唔好意思」。

其實食衞局粗心辦事，搞到咁多「吊緊鹽水」嘅小店蒙受生意損失，都只係搪塞一句「唔好意思」就蒙混過關，真係多謝晒。

最弊係，當你以為局方會吸取教訓，點知事隔唔夠一個月，又再犯同類錯誤，好似無反省過咁，確實令人失望。諗深一層，局方訊息咁混亂、辦事又粗心，叫市民點信任政府可以帶領我哋走出「疫」境呀？