政情：火爆財會 屈工聯會收埋CSI口罩 峯鴿亂噏遭圍插

泛民被鬧無恥唔肯捐錢

會議進行咗大約兩個鐘頭左右，民主黨議員許智峯（峯鴿）回顧緊政府同建制派喺新冠肺炎疫情爆發初期至今喺抗疫工作做過啲咩嘅時候，突然提到政府將懲教署生產嘅CSI口罩畀咗工聯會同民建聯，引起議員陸頌雄同埋議員陳恒鑌不滿，陸頌雄提出規程問題，要求峯鴿澄清言論，又話「我哋啲口罩係工聯會自己做」，質問峯鴿會唔會收番「工聯會收埋啲CSI口罩」呢句說話，而陳恒鑌就鬧「你（峯鴿）自己唔派口罩掉轉頭屈我哋（民建聯）收埋啲CSI口罩」，又叫峯鴿拎證據出嚟，如果無證據嘅話，請波哥要求峯鴿收番呢啲冒犯性、又嚴重同離譜嘅指控。波哥就話佢作為主席係主持會議，無辦法證明議員說話真偽。

而喺辯論中止待續嘅期間，議員何啟明點名鬧公民黨議員楊岳橋並唔在乎個議案是否通過，因為失業嗰個唔係你（楊岳橋）吖嘛，何啟明又話，依家真係好多人失業，又鬧泛民無恥，叫佢哋捐少少錢都唔肯，話唔該泛民要本住良心做嘢！不過議員陳淑莊反駁，話嗰個唔係楊岳橋，而係人民力量議員陳志全，何啟明想反駁但遭陳淑莊怒斥「我講緊嘢你就唔好嘈啦傻仔！」議員蔣麗芸勸大家唔應該喺度嘈交，大家都想盡快通過基金。波哥就話雖然佢前晚好谷氣，但好多市民都喺度睇緊會議直播，希望大家互相尊重。

波哥叫張超雄勿搞「興」人

直到晏晝續會後，峯鴿黨友尹兆堅喺座位上高呼「我想鬧嗰啲建制派全部唔係位度」，反問我哋（民主派）發言表態就叫拉布咩？波哥就話嗰廿條臨時動議無法律約束力係事實。議員張超雄其後提出規程問題，問波哥點解會鬧啲入臨時動議嘅同事呢？又話咁樣唔似係主持會議喎。張超雄呢句說話一出，就激到波哥「紮紮跳」，連珠炮發咁還擊，「一條臨時動議（通過處理）起碼傾一個鐘，廿條就廿個鐘」，叫張超雄唔好搞「興」人先得o架，唔該收聲。