政情：馬逢國自爆唔熟體育界
每位功能界別議員都代表自己專屬界別，喺議會內為界別發聲謀福利，但體育、演藝、文化及出版界議員馬逢國尋日接受電子傳媒訪問時，竟然話自己唔係好熟悉體育，仲話冇可能覆蓋晒議席所屬嘅四個界別，但就話自己上任之初有份成功爭取落實啟德體育園計劃喎，之但係馬議員咁講，真係嚇親一班業界人士喇。
只覆蓋到三個界別
自二○一二年起擔任兩屆該界別議員嘅馬逢國，被體育界質疑係外行人，而佢喺訪問中竟然又話自己唔熟悉體育界，仲話政制上有缺陷，冇可能為每個界別都分配獨立議席，佢都冇辦法咁話。仲話佢個議席代表體育、演藝、文化、出版四個界別，好難有一個人或議員可以完全覆蓋這幾方面。
而佢自己就覆蓋咗三個部分，都做過演藝、文化、出版界嘅工作。至於體育，佢最多只係一個愛好者、參與者或觀眾，但確實唔係好熟悉喎。馬逢國咁講，一班體育界人士一定嚇一嚇，唔知佢會唔會因為喺體育界認受性低而再加把勁呢？