中環出更：衞生委員會開會 靠午飯時段攝位
受疫情影響，立法會好多事務委員會會議都要延期，但衞生事務委員會反而喺下周三召開特別會議，話要討論預防同控制疫情嘅措施，主席蔣麗芸（Ann）尋日話，因為嚟緊呢個禮拜一至四都要開財務委員會特別會議，既然秘書處因應財委會而返工，難得大樓咁齊人，就搵吓啲空檔時間，最後決定喺禮拜三嘅午飯時段「攝位」開會。
依家疫情仲係好嚴重，擔唔擔心開會會增加傳播病毒嘅風險呢？阿Ann話都唔諗得咁多喇，相信議題唔止議員關心，全港市民都一樣咁關注。佢又話當日會有多個部門代表出席會議，包括食物及衞生局、商務及經濟發展局、保安局、勞工及福利局、民政事務局、教育局、創新及科技局、政制及內地事務局、財經事務及庫務局同埋扶貧統籌處。
陳肇始料「蒲頭」
阿Ann話呢個安排係因應食衞局上次開會嘅要求，同時通知唔同嘅決策部門參與會議，估計局長陳肇始到時好大機會會「蒲頭」。
至於係邊位議員提出開會？阿Ann話建制派同泛民主派都有同事要求，之前分別有經民聯議員梁美芬同民主黨議員黃碧雲，最新嗰位就係公民黨議員陳淑莊。
卓妮