政情：唔追免費電視頻譜費 商經局摑港台一巴
早前通訊事務管理局宣布，免費電視持牌機構可以揀唔播香港電台製作嘅節目。消息一出，即刻惹來港台工會同好多民主派議員批評，仲話依家免費電視唔再播港台節目，理應要畀番足獲豁免嘅近四億港元頻譜費政府喎。
指停播港台節目仍符政策精神
但商務及經濟發展局尋日書面回應特別財委會嘅質詢就話，即使免費電視停播港台節目，依然符合「不徵收頻譜費嘅政策精神」。商經局咁講，咪即係大大力摑咗港台同班泛民議員一巴，究竟點解呢？
話說議員譚文豪早前透過書面問題向商經局查詢「向免費電視追收頻譜費」一事，局方回應時就重申，「播港台節目只係豁免頻譜費中嘅一小部分要求」，其實只要免費電視持牌機構每星期提供合共超過一百小時包括新聞報道、時事節目、紀錄片、文化藝術節目，同埋以兒童、長者及年輕人為對象嘅節目，以及有英文為主嘅頻道就得喇，並唔係話「非港台節目不可」。
即係仲使唔使畀番近四億港元頻譜費政府呀？商經局就話：「唔使喇」，仲強調「即使免費電視持牌機構唔再被要求播放港台節目，佢哋仍然符合不徵收頻譜費嘅政策精神」喎。哇，局長邱騰華呢巴掌真係打到應一應呀！