政情：黃傑龍絕橋防疫 10粒蒜頭生食
世界衞生組織早前將新冠肺炎目前嘅情況定性為「全球大流行」，但到依家仲未有可以治愈肺炎嘅疫苗。稻苗學會會長黃傑龍（Simon）日前喺社交平台貼文，話研究到一個預防新冠肺炎嘅方法，仲可以預防「人傳人」添！乜嘢方法咁犀利？
臭到所有人彈開兩米
Simon嘅方法就係：每日食十粒蒜頭，仲話最好生食，咁自然所有人都會立即同佢保持兩米距離。佢冇多加解釋，諗都諗到係口臭喇！有網民即時質疑「戴咗口罩外人聞唔到」、「戴住口罩，應該係自己頂唔順自己」，亦都有人話Simon幽默，仲話「唔幽默，點度日？」
蒜頭防疫法仲引發「民間智慧」，紛紛提出改良版。有網民建議食番薯然後勁放屁，仲話可以照戴口罩，亦唔會臭到自己添！講吓笑有助紓緩疫情下嘅壞心情，但最好用番有實效嘅方法，戴番口罩穩陣呀！