政情：張嘉莉辦畫展 幫街坊掃走負能量

灣仔區議員張嘉莉（Clara）日前喺Facebook貼文，提到會舉辦「口罩下的心情」嘅創作及展覽計劃，邀請佢所屬選區、跑馬地嘅街坊參加。Clara話依家大人同小朋友都多咗時間留喺屋企，希望佢哋可透過創作抒發當下嘅心情，唔使咁鬱結。

接觸街坊 產生靈感

Clara本身鍾意創作，但唔會只係喺唔開心嘅時候先畫畫，但佢話以個人經驗，當一個人進行藝術創作時，成個人就會好集中精神，唔會咁容易畀其他事情煩心。咁當選區議員後會唔會少咗時間創作？

佢話至今兩個幾月仍有參加活動，唔覺得區議員嘅職務阻礙到佢嘅創作，仲話依家接觸唔同嘅街坊，反而畀咗佢更多靈感添！