中環出更：郊野公園好熱鬧 曾鳳珠行山撞到熟人
到郊外行山遠足，絕對係有益身心嘅活動。香港菁英會主席曾鳳珠（Ellen），就指疫情之下，好多人都透過行山來鍛煉體魄，結果早幾日佢喺大潭郊野公園，不足四公里嘅路程就撞見十位朋友。佢話就算喺市區，遇到熟人嘅頻率都未必有咁高囉！
郊野公園都變得咁熱鬧，係咪代表行山都避唔開人潮呢？Ellen話未必，其實唔少郊野路段因難度較高，人迹會較為疏落。由於兩個月後Ellen將聯同菁英會行山游水隊嘅成員，參與一項游水同跑步交替進行嘅兩棲賽事，於是佢就約埋幾位隊員，日前到南區一帶進行戶外操練，因操練路線需要相當嘅體能，遊人自然少咗好多。Ellen又話近日嘅應酬都告吹，佢上個月留喺屋企食飯嘅次數，可能多過舊年嘅總和，亦令佢有更多時間，同家人及長輩傾談，聆聽心事。
卓妮日前喺一個場合見到菁英會常務副主席林凱章、互聯網專業協會行政總裁林漢威，以及香港創科發展協會主席陳迪源。其中陳話近日因響應居家工作，而佢兩位千金又因學校採取網絡授課，父女喺屋企相處嘅時間就多咗。佢認為港人居住空間有限，與其一家人共處蝸居易生摩擦，不如舉家到戶外享受大自然。佢話近日於購物網站發現多款可以安裝於車頂嘅營幕，張開之後儼如流動居停，作為旅行車車主嘅佢都有意購置一套，咁就唔怕露營場地爆滿嘅問題喇。
彭子傑憂去唔到日本睇元祖高達
除咗到郊外，港人都好鍾意遨遊四海。數碼娛樂協會會長彭子傑，就慨嘆日本暫停港人免簽證入境，旅遊勝地又少一個。佢話本來計劃今年十月出席東京DigiCon，順道往橫濱參觀會行走原尺寸嘅元祖高達機械人。但若果東京奧運因疫情而宣告延期的話，就有可能打亂DigiCon嘅原來安排，從而影響到佢一睹元祖高達嘅機會。所以佢希望疫情盡快過去，唔再擾亂大家嘅生活咁話。
卓妮