中環出更：排檔生意暴跌九成 邵家輝促政府補漏
政府早前推出第二輪防疫抗疫基金及措施，日前獲立法會財務委員會通過，但就被鬧爆有好多行業仍未涵蓋，即係補極都漏。批發及零售界議員邵家輝就走落女人街同廟街，話好多商販都急需政府支援呀！
女人街廟街 朝行晚拆成本高
邵家輝喺社交平台上載短片，話日前走落女人街同廟街，因疫情關係，依家兩條街道都十分冷清。片中有商販話兩條街本身喺修例風波期間，生意已經減少四至五成，依家生意仲難做，起碼暴跌九成，有時做足一日先得二十蚊咋，仲有部分商販話現時直頭零收入添！
而邵家輝都話兩條街不同於其他地方嘅排檔，因為朝行晚拆有成本，每個月都需要畀約四千蚊，所以唔少排檔都選擇唔開舖、慳番筆。而佢就希望政府可以堵塞漏洞，向呢兩條街嘅排檔給予額外支援，否則呢班小販真係生計難保喇！
政府做嘢成日都話要有針對性，實際上涵蓋範圍細就變相甩漏，唔知下次又會係邊個行業話需要支援呢？
卓妮