波多野結衣銷量之霸AV真女神

由海外紅返日本

波多野結衣呢個名不論係咪AV迷相信都會聽過，之但係大家仲記唔記得，佢喺2008年6月出道時AV處女作叫乜名呢？答案係由AV片廠Prestige製作嘅《ZERO素人以上，女優未滿 07》，唔經唔覺已差不多12年，雖然Prestige係大片廠，但其實佢唔係呢間片廠嘅專屬女優。

去年結衣喺訪問中表示，當年喺街上被AV星探發掘，當時佢表示想做寫真女優，但對方游說佢做AV女優唔單止可以拍寫真，仲可以拍AV搵錢，如果有片廠簽佢做專屬女優，收入仲相當和味添！結果佢就入咗行，但由於當時佢冇被片廠睇中，故此一直以企劃單體AV女優發展。不過企劃單體女優只有拍片才有收入，即係話手停口停，後來佢去咗日本海外發展，因為個樣勁有明星相，被稱為「暗黑林志玲」而爆紅，不但令AV銷量上升，同時紅到返日本，日本AV迷同片廠至發覺，原來佢哋走晒寶！雖然當時有AV片廠想簽結衣做專屬女優，但時移勢易，升呢做咗AV界女神，兼成為日本AV界海外代表人物，片酬已經唔再係當年咁低，所以佢選擇一直做企劃單體女優。

產量多獲獎無數

結衣先後喺2014年同2019年嘅Sky PerfecTV成人放送大賞獲得「女優獎」，再喺2014、2016同2019年成為日本AV網售平台DMM（現稱FANZA）嘅「年度最高銷量女優」，同時又喺2018年嘅Sky PerfecTV成人放送大賞榮獲「年度最多產嘅女優」，更喺日本海外紅到爆燈，曾經為台灣悠遊卡公司發行聯名紀念卡，但係佢並未因此減少AV產量，仍然保持住高質嘅肉搏演出。

多年嚟佢演出超過1,400套AV，不過佢坦言當中有啲作品拍完後感到後悔，例如2016年嘅《銅粉奴》，佢解釋喺片中全身油成金色嘅金人扮相騎呢，但其後因為作品大受歡迎，所以冇耐佢就改口話呢個係AV演出生涯嘅里程碑。另一部係早前成為話題作嘅《小丑之女》，片中佢化身成荷里活電影嘅小丑女，不過佢覺得化咗個小丑妝同男優啪啪啪，賣相相當核突，之但係家陣已成話題作，唔知過咗一陣後又會唔會轉口風呢？

多年密密演出幾乎無間斷演出AV嘅結衣，最近宣布由3月起無限期休息，表示希望畀時間自己抖吓。希望佢呢次休息時間唔會太長，因為有好多粉絲期待佢嘅新作推出o架！

波多野結衣

出生地：京都

身高：163cm

三圍：35E-23-35

撰文：魂