中環出更：傾有薪產假 泛民被轟癱瘓內會
早前政府就提出將法定產假由十星期增至十四星期嘅《二○一九年僱傭（修訂）條例草案》繞過內會，轉交人力事務委員會審議。尋日事務委員會開特別會議，建制同民主派喺會上互斥對方食「人血饅頭」，搞到傾成兩個鐘都未開始審議。明明條例草案都冇爭議性，不過兩邊都咁拗法，到時條例草案通過唔到，乜饅頭都冇得食喇。
事務委員會主席何啟明尋日就話，本立法年度最後一次會議喺七月十五日，政府當局需要喺六月廿九日作出恢復二讀嘅預告，所以事務委員會如果喺六月廿九日前未完成審議，條例草案就趕唔切喺本立法年度通過。
與建制互批食人血饅頭
有鑑於事務委員會同法案委員會有別，民主派議員質疑事務委員會冇得將條例草案逐條審議，而建制派議員就認為法案冇爭議性，希望民主派可以放低政治鬥爭，其中工聯會郭偉强批評民主派刻意癱瘓內會，形容內會係一條公路，話依家因為山泥傾瀉而搞到要行第二條路，仲以西貢區議會發生嘅事嚟批評民主派食人血饅頭。
被指食人血饅頭，民主黨黃碧雲隨即質疑西貢區議會嘅事同有薪產假嘅關連性，仲話如果可以離題，「咁我講水滸傳得唔得」。佢嘅黨友尹兆堅直斥郭偉强冇邏輯，仲話「食人血饅頭你哋建制派食得少咩」，認為香港市民依家流緊血係建制派造成。
法律顧問就喺會上表明，事務委員會冇得逐條條文審議，仲話睇唔到今次轉交事務委員會審議嘅程序有違反《議事規則》同埋法律。
卓妮