政情：葉劉再推介餐廳焗豬飯被嘲靠害

立法會議員葉劉淑儀（葉劉）不時喺社交網站分享旅遊照片，最近唔知係咪「轉行」做飲食界KOL，多次喺網上介紹食肆。尋日佢又再上載到西環一間有五十年歷史嘅茶餐廳食焗豬扒飯（焗豬）嘅照片，點知上載咗幾小時，已經有近二千個留言。唔少網民都話葉劉介紹餐廳等同「死亡之吻」，甚至有網民直指佢「靠害」添。

社會撕裂嚴重，部分市民光顧食肆都要睇餐廳嘅政見立場。大約兩個月前，葉劉都幫襯過一間老牌菜館兼喺網上分享，而呢間菜館正正就係被杯葛嗰間，葉劉一出貼文，就有網民叫佢咪愈幫愈忙。似乎葉劉冇將呢件事放喺心上，事關佢尋日再介紹另一茶餐廳嘅「生招牌」焗豬，又大讚香氣四溢，即使落單後最少要等近廿分鐘都值得喎。

網民見到葉劉發貼文後就都好踴躍留言，有人講反話感謝葉劉分享，表明一定唔會幫襯；有人就問呢間食店係咪得罪咗葉劉；有人直言葉劉送出嘅係「死亡之吻」。其實葉劉已經喺貼文講咗，茶餐廳老闆十分友善，亦樂意畀佢網上分享食評，睇嚟呢位老闆應該都冇有怕喇。