政情：邵家輝疑爆粗 轟食衞局選擇性讀報告
政府官員選擇性做嘢都唔係第一次，喺尋日一個委員會會議上，政府官員選擇性引用數據，嚟表達加熱煙嘅禍害，游說議員支持全面禁售加熱煙。對於政府官員支吾以對，立法會批發及零售界議員邵家輝都睇唔過眼，懷疑爆粗，大聲講咗句「Ⅹ你點解讀啲又唔讀啲嘅呢？」反映佢對政府咁嘅做法好不滿。
引美國報告 指電子煙對人體有害
話說食衞局官員尋日喺立法會審議《2019年吸煙（公眾衞生）（修訂）條例草案》委員會會議上，堅持要全面禁止另類煙草產品，並引用美國食品藥物管理局等報告，帶出雖然加熱煙的毒性未明，但唔代表傷害比傳統煙低，但議員多番質疑係乜嘢毒性成分，含量幾多會對人體有害？但官員都冇正面回應。
一向係反對禁止電子煙同加熱煙嘅邵家輝喺會議上都毫不留情，反咬官員一口，仲疑似爆粗大罵「Ⅹ你點解讀啲又唔讀啲嘅呢？你淨係讀啲對你啱嘅嘢！」即使邵家輝睇唔過眼大罵政府官員，但官員仍然九唔搭八，迴避問題，繼續搬龍門，選擇性引用數據。