政情：港大逾半醫學課改網教 梁卓偉：經歷絕望冬天
反修例風波持續，多間大學受到唔同程度嘅破壞，大專院校紛紛宣布提早完結本學期。香港大學醫學院院長梁卓偉發表院況咨文時話，本學年嘅兩個學期分別有五成七同三成半嘅課堂要改為網上教學，而大學會喺下學年嘅課程作更靈活安排。佢又形容現時正經歷「絕望的冬天」，展望春天可帶來希望。
梁卓偉又提到，佢仍被唔少人問到點解大部分學生同醫護人員持有特定政治傾向，而佢認為高級教育者同醫護人員亦捲入政治嘅風眼中，又認為醫護人員同教師接受相關培訓時，都會被灌輸同理心概念，並企喺病人、弱者同溫順嘅一方。
預算案擬留160億元作增建或翻新
風波至今仍未平息，佢話自六月以嚟嘅形勢，令學院加倍下定決心應對挽留同招募優秀人才嘅短期挑戰，以及要把握政府長遠致力於創新及科技所帶嚟嘅新機遇，因此會招募一百四十個教授。佢又總結過去一年嘅成果，例如財政預算案提到將預留一百六十億元專款，供教資會資助大學增建或翻新校舍設施、添置科研設備，而學院亦已提交標書，期望運用有關撥款，開發同提升研究硬件，並重建臨床試驗中心。