政情：協調不足撞區攬炒 林卓廷認衰
今屆區議會選舉塵埃落定，民主派取得逾三百個議席，但有人歡喜有人愁，其中喺沙田帝怡選區，就因為同屬民主派嘅民主黨同埋沙田區政撞區，最終民建聯林港坤「漁人得利」勝出。唔少沙田區市民對撞區導致攬炒感到不滿，仲有街坊發起聯署，批評民主黨冇協調添。民主黨新界東立法會議員林卓廷尋日喺Facebook就事件拍片道歉，承認喺選區協調上做得不足，唔知班街坊又點睇呢。
沙田街坊聯署批評
話說喺帝怡選區中，沙田區政之前就話喺上年十一月就已經派出沙田區議員黎梓恩嘅助理謝潔泳喺該區做社區工作，比民主黨參選人劉青仲要早落區。至於民主黨方面，就話喺上年十月已通知民主動力，表明有意派人參選，喺今年五月確認獲得參選權。今屆本身都有唔少區出現民主派撞區，但有部分最終都靠初選協調到，而喺帝怡選區方面，沙田區政都提出過搞初選，但最終唔成事。
由於喺今次選舉中，沙田區只得帝怡選區唔係民主派出任，難怪有街坊搞聯署啦！林卓廷喺道歉片段中，就話完全感受到市民嘅失望同唔開心，近日有虛心聆聽市民嘅批評，同埋話有認真反省，喺選舉協調同溝通上有不足，為此表達真誠歉意。佢仲話事件令佢哋吸取教訓，未來會做好協調工作，避免重蹈覆轍。