政情：今日你上鏡：楊偉雄倒轉「欣賞香港」

創新及科技局局長楊偉雄平日對衣着甚為講究，之前連戴呔都鍾意與別不同。日前佢出席一項活動時，西裝領上就戴咗一粒銀色圓形物體，但我哋睇來睇去都估唔到係咩嚟，仲以為係偷聽器，當然要向局長請教吓係咪高科技產品啦！一問之下，原來只係局長將個「欣賞香港」襟章前後反轉咗嚟戴。佢就笑笑口即時拆個襟章出來再戴過，但可能一時情急，竟然又將襟章上下倒轉咗嚟戴，真係瘀爆！不過唔緊要啦，咪叫啲市民同旅客倒立「欣賞香港」囉！