政情：張華峰剝牙 下巴腫似被私了

依家先食到流質嘢

話說肥老闆上星期六剝牙，因為左邊下面大牙都蛀咗一段時間，唔剝唔得，結果用咗兩粒鐘先剝到。雖然牙醫係相熟醫生，不過可能嗰日手勢唔好，刮到佢啲牙肉，搞到牙肉出血。肥老闆話，啱啱剝完牙都唔覺痛，麻醉藥過咗先至嚟料，當晚食唔到嘢，去到第二朝早起身就開始又腫又瘀喇。

佢話依家可以食流質嘢，但都要就住就住咁用右邊牙食嘢，又話冇敷面散瘀，因為佢唔識呢啲嘢喎。大家就提議佢叫老婆用雞蛋碌吓，佢就話會試吓，遲啲就會再補番隻新牙。希望佢下次鑲牙嗰陣唔會又搞到瘀晒啦。