政情：何啟明WhatsApp被封 冇影響與妻談情
香港人個個「機不離手」，無論同朋友傾偈定係公司同事傾公事都係用手機通訊程式溝通，所以萬一冇得用，都咪話唔頭痛。勞工界立法會議員何啟明原來佢之前冇得用WhatsApp程式，佢太太仲喺法國留學，會唔會冇得同太太傾偈，好唔方便呢﹖
疑因轉發太多嘢畀街坊
何啟明話，佢早前突然登入唔到WhatsApp，螢幕顯示其電話號碼已被禁止使用WhatsApp，並請佢聯絡客戶服務中心尋求幫助。佢就估計可能因為成日轉發消息畀街坊，畀人當咗係濫發訊息。之後有同事就教佢隔日先傳一次電郵畀客服，廢事日日傳會畀人當係垃圾訊息。不過佢已經傳咗四、五封電郵喇，但都係冇回覆。佢仲話WhatsApp入面有好多珍貴嘅對話同相，要重啟帳戶先睇得番。
佢又話，不幸中嘅大幸係街坊仲可以打電話搵佢，所以暫時冇街坊詐型。咁佢太太又有冇呢？佢就話，佢哋兩公婆不嬲都係用另一個通訊程式溝通，該程式有視像通話功能，所以冇影響佢同太太傾偈喎。佢哋相隔咁遠，真係分分鐘視像見少晚老婆都嬲豬o架。