政情：八網難逃：張國鈞扮師傅贏得吞拿魚頭
身為律師嘅立法會議員張國鈞（Horace），一向都係西裝筆挺，但估唔到官仔骨骨嘅佢原來扮嘢都有一手，仲贏埋個模仿比賽，而獎品就係藍鰭吞拿魚頭。
Horace前晚出席香港律師會聚會，同班朋友聯誼期間，就玩咗個模仿日本師傅整料理嘅比賽，仲要拎起魚生刀，扮日本料理師傅切食物。佢透露，自己係第一次參加呢類型嘅比賽，甚至從來都冇拎起魚生刀嘅經驗。不過佢早前都講過，話十幾歲時就會買餸煮飯，揸慣鑊剷、切菜煮餸，應該算係熟手技工喇，相信煮日本料理對佢嚟講應該都冇乜難度嘅。
拎起魚生刀 稱從政者唔怯場
咁拎起魚生刀嗰刻有冇怯場？Horace就話冇，仲認為從政嘅人唔應該怯場。佢仲話自己就連立法會咁混亂都未怕，又點會怕把魚生刀。不過，佢前晚就冇口福嘞，事關前晚佢有地區活動，所以未食鐵和板同吞拿魚腩壽司，就要去酒樓趕下場，好彩都有燒鵝同粉麵食。不過，食唔到和牛都唔緊要啦，反正都贏咗個藍鰭吞拿魚頭，可以拎返屋企慢慢歎喇！