中環出更：失值60萬元沉香手串 金鈴盼擋災
被指為中國最好藥物嘅沉香又有「木中鑽石」之稱，唔止可以保值，仲有升值潛力。有「金錘拍賣官」之稱嘅金鈴原來同沉香都有好深嘅淵源，話說十一年前佢懷孕期間妊娠反應嚴重，經友人介紹下開始接觸沉香，自此愛上沉香嘅味道。不過佢之前就遺失咗一條沉香手串，而呢條手串仲曾經有人話願意出六十萬元收購。金鈴雖然大感心痛，不過佢就話條手串唔見咗，可能係幫佢擋咗啲嘢喎。
金鈴話佢當年懷孕時成日嘔吐，嘔到塊面嘅微絲血管都爆裂，有次聞到友人佩戴嘅沉香，覺得非常舒服，經介紹後就花咗五萬元買咗一串沉香手串自己戴，妊娠反應即時得到紓緩，之後佢就開始研究、收藏沉香喇。可惜有次佢去洗手間，將手串除低之後丟失咗，不過佢就自我安慰話唔緊要，因為佢覺得沉香係有生命、有靈性、同人有互動，可辟邪擋災，唔見咗可能係幫佢擋咗啲嘢咁話。
周樹堂：鍾情古翡翠 嘆大眾唔識寶
有「沉香大王」之稱嘅周大福後人周樹堂提到自己曾經鍾情於收藏古翡翠，認為古翡翠較深色透徹，晚上甚至會發出寶光。但至七十年代，古翡翠幾乎絕迹，出現咗B、C貨翡翠，即係將化學品加入石頭，雖然都係非常搶眼，深受大眾喜歡，但事實上呢啲翡翠約十年就會褪色。佢慨嘆好多人鍾意呢啲「假翡翠」，反而真嘅就冇乜人留意。而佢自己廿年前亦都開始接觸同收藏沉香，認為沉香既可升值，又對身體好喎。
賴國偉：學習沉香知識考慮收藏
同場仲有香港傳承基金主席賴國偉（Willie）同恒昌順養生文化中心董事王亞明。Willie就話，佢有收藏中國書畫、和田白玉及紫砂茶壺等，至於沉香就仲學習了解緊，但已慢慢產生知識及興趣，都考慮緊收藏沉香。佢又話，留意到最近有拍賣會高額拍出現代藝術品，甚至比齊白石、四大名家作品更昂貴，都覺得不可思議，認為傳承基金有迫切需要去進一步推廣中國文化。
卓妮