中環出更：密會李柱銘高達漢奸黎又攪局
反修例引發嘅風波逾五個月仍未停止，本港各處都爆發暴力衝突，甚至蔓延到各所大學，咁啱美國參議院剛通過《香港人權與民主法案》，被內地官媒狠斥「叛國禍港四人幫」之首嘅壹傳媒黎智英（漢奸黎）又同多名泛民人士密會，當中包括同為「叛國禍港四人幫」、有「李漢奸」之稱嘅民主黨（白鴿黨）創黨主席李柱銘，唔知呢次密會係咪又諗計攪局？
漢奸黎尋日早上約十時十五分離開何文田寓所乘車到中環雲咸街，獨自步入某商業大廈，喺約十一時五十五分就見到喺多次反修例遊行儼如其保鏢嘅白鴿黨立法會議員林卓廷亦到埗，李漢奸就喺約十二時四十五分走進大廈。
林卓廷李卓人等泛民有份
直至下午約二時十分，因違法佔領行動（佔中）案被判囚八個月，但獲緩刑兩年嘅民主黨前主席李永達（高達）同李漢奸一齊離開，佢哋仲邊行邊密斟，唔知傾啲乜嘢？大約十五分鐘後，就見到林卓廷、收咗漢奸黎秘密捐款「袋住先」九個月嘅工黨前主席李卓人，仲有喺佔中案被判囚八個月嘅社民連副主席黃浩銘喺大廈走出嚟，最後漢奸黎亦上車離開。
美國國會剛通過人權法案
漢奸黎之前多次參與反修例遊行，仲扮係總指揮，而喺遊行前亦會密會泛民人士，但喺近兩個星期就更加頻密。唔知係咪咁啱得咁蹺，每次密會後都爆發大型嘅暴力衝突，例如喺本月十日傍晚，佢同「搞事四人幫」之一嘅天主教香港教區退休主教陳日君密會後，翌日中文大學校園就爆發激烈衝突，更導致交通癱瘓，而佢喺十一月十六日同高達、李卓人及黃浩銘密會後，翌日紅磡理工大學亦爆發暴力衝突，到咗今日，仲有幾十名示威者唔肯離開校園。
喺理大嘅暴力衝突稍為緩和，而美國參議院剛剛通過《香港人權與民主法案》，漢奸黎又急不及待同泛民人士密會，密斟咗逾兩個鐘，唔知係咪又諗計想搞亂檔呢？
卓妮