中環出更：何俊賢鬧暴徒令港墮「量子騙局」
立法會尋日繼續討論休會待續議案，唔少建制派議員都借機炮轟現時「黑衣暴徒」對社會嘅破壞。漁農界議員何俊賢形容香港好似跌入咗「量子波動政治騙局」，呼籲政府要盡快拉到犯罪集團！
理論似是而非 竟然有人信
何俊賢發言時首先提到早前有新聞報道內地嘅「量子波動速讀」騙局，交萬四蚊學費就可以容易啲搶到演唱會飛、買彩票會中獎，質疑咁嘅嘢都會有人信，佢就話現時香港嘅情況正正符合晒呢種騙局，只要有一大堆唔知咩嘅理論，當中加少少聽得明又好好聽嘅理論，再形容到可以從中得到巨大利益，就會有好多人信。
盡情破壞 盧偉國斥如魔鬼
唔少議員心中有火，工程界議員盧偉國仲引用電視劇嘅主題曲《難為正邪定分界》嚟形容啲暴徒。首歌當年好流行，特別由魔鬼同凡人對唱，歌詞：「努力興建，盡情破壞，彼此也在捱，人間的好景給我一朝破壞。」佢話香港依家情況就係呢套電視劇嘅現實版，極端分子嘅暴力行徑日漸升級，又用汽油彈攻擊警察同途人，到處縱火，濫用私刑，依家仲破壞路軌，火燒活人，又形容暴徒就係魔鬼。
卓妮