中環出更：朝早起身沖個涼 金鈴：先熱後凍精神晒
近排天氣開始涼，日夜溫差較大，真係要好好保養吓身體先得。卓妮日前出席國際鋼琴藝術家吳牧野嘅鋼琴音樂會，在場見到幾位靚太，究竟佢哋有乜嘢保養心得？「金錘拍賣官」金鈴好關注自己身體，例如朝頭早起身一定要沖番個涼，到最尾嗰幾秒用凍水嚟沖身體，可以加強自己血液循環令到成個人精神晒。
講到點樣保護皮膚，金鈴話天氣涼就開始乾燥，身體會搽多少少潤膚膏滋潤，同做多啲面膜，佢話試過去啲中國北方地方工作，因為唔適應天氣有時成身皮膚好似爆裂咁，就會做Spa滋潤番皮膚，若果唔使應酬，佢會喺屋企煲番啲湯水嚟飲都好好o架！
趙曾學韞：雪梨燉螺頭滋潤
香港骨髓捐贈基金會會長趙曾學韞（Alice）就話從來都冇食補品，除咗生完BB仔嗰一個月，但就話自己一向鍾意運動，游水或者行山，仲話朝早七點至九點係自己嘅運動時間，之後就返工，所以身體一向都冇乜大問題，近排天氣乾燥就會燉啲湯水飲吓，自己就鍾意飲雪梨燉螺頭，對天氣乾燥好有用，可以滋潤吓身體，仲話唔同季節飲多啲時令湯水，對身體都好有幫助。
蔡關穎琴：每晚瞓前搽精油
轉頭又見到香港中華總商會婦女委會主席蔡關穎琴，佢話天氣凍就最鍾意食蛇羹，食完成身都會暖笠笠，但係依家唔係凍只係涼咗少少，所以未食住，不過皮膚就開始乾燥，所以每晚臨瞓前都會搽精華油，等皮膚吸收吓，佢都食開維他命丸同埋煲吓啲湯水飲，內外都可以滋潤吓，都OK o架！
卓妮