中環出更：中學校長憂斡旋後被出賣 李家超改口無再用「自首」
理工大學一帶成為戰場多日，唔少教育界人士努力說服留守校園內嘅學生離開，落力進行斡旋工作，希望令事件告一段落，偏偏保安局局長李家超猶如「倒米壽星」，搞到連中學校長都忍唔住發火。
李家超尋日話全部離開理大人士都會以暴動罪拘捕，又叫相關人士要盡快自首。不過，一直協助理大校園內嘅人士一直以對外宣稱，未夠十八歲人士自願離開，只會登記身份證唔會被捕，但警方會保留追究權利，明顯說法有異，搞到唔少校長都對李家超嘅說法表達關注，強調由頭到尾嘅游說行動都唔係叫班學生自首或者被捕，似乎擔心會被政府出賣，更失去埋學生嘅信心。
死撐警立場無變
唔知李家超係咪見到群情洶湧，喺呢五個幾月示威浪潮期間甚少低聲下氣認衰嘅佢，竟然要喺同日下晝仆出嚟澄清，而且一改用字，只叫相關人士將自己交出嚟，無再用上「自首」兩字，但稱仍然死撐警方行動立場無變。咁點解佢原本要叫人自首，唔通佢係鬼拍後尾枕，自爆一直諗住氹住啲學生先？
卓妮